話說...
每日 5:30PM，只要你行出公司門口，搵個有陽光的地方，企定...
然後面向西南，打開你個手袋，心裡面唸着 Come on...Money！
天上就自然會有錢跌落你的手袋架啦，仲跌得好準添，信我啦...
就係傳說中的星之金幣啦~~

以上故事...係我向一位搵我幫手睇冧巴的朋友 K 講的~~
自從幫 FCI 的 Ken Sir、軒 Sir、Walter Sir 搞投資課程之後，身邊不少朋友都問我，邊隻邊隻點睇，大家交流下有乜所謂丫，不過朋友 K 都真係惡搞~~

朋友 K 問我的股票，十隻有九隻我都唔知係乜東東，佢就更加唔知啦~~
說來奇怪...朋友 K 經常收到很多內幕消息，記得有一次...
　我買咗 XXX，好耐都唔郁，你幫我睇吓...
　買咗幾耐呀？
　大前日買架！
　哦...買咗三日咁耐呀？！辛苦晒喎~~

近日她又有新消息，今次呢隻我識喎...
　朋友叫我瞓身 2309，話會炒上 $0.8 喎（現價約 $0.4）睇下堅定流？！
　老友...阿水都知佢等錢使，要供股集資啦，買英超球隊伯明翰嘛！
　聽講話聽日會停牌，然後復牌炒上 $0.8 喎！
　係？一來，隊波麻麻，降班咪渣都冇？！二來，將來買球星仲有排集資...
　唔係喱...

恕 Dozy 唔夠膽色，對於所謂細價股的內幕貼士，一向當故仔聽。
老實講...如果一隻細價股要供股集資，當然要先散播利好傳聞，將股價炒上，才會供到好價錢。之但係...今次點解供股，集資做乜，一早通晒天，係咪真係可以咁順利，短時間炒高一倍？再者...家陣唔係炒菜，如果要炒上，必定要經過收貨、蘊釀，圖表上總可以看到端倪。因此我的結論是...睇下俾貼士你的高人，以往的貼士準唔準啦，如果準的，咪小注顛下囉，如果唔準的，啋鬼佢啦！瞓身？唔係化？！

的確有人靠內幕貼士賺很多很多錢，然而...是你嗎？是我嗎？
不敢說朋友 K 今次的貼士唔準，可能真係會兩日爆升一倍俾你睇，因為細價股很多時會脫離基本因素的。只是從來不相信自己有這樣的運氣，聽個冧巴買落去，兩三日就爆一倍？還是用阿 Sir 教的功夫，認認真真的尋寶好，買得安心，賺得放心。